Sa kasaysayan ng Philippine sport, isa ang athletics sa mga pampalakasan sa international scene kung saan nagpapakita ng dominance ang mga atletang Pilipino katulad nina Elma Muros, Lydia De Vega, Earnest John Obiena, at iba pa.Katulad ng mga Athletics legend sa bansa, umuukit na sina John Clinton Mitchel Abetong at Jericho Obsanga Cadag ng Dasmariñas East Integrated High School ng kani-kanilang pangalan sa international level matapos nilang mag-uwi ng karalangan para sa Pilipinas sa katatapos lamang na Jogja 24 – Indonesia U18 Athletics Open noong July 20-24 ngayong taon.

Napanalunan ni Jericho ang mga gintong medalya sa 1,500-meter run, 5,000-meter run, 2,000-meter Steeplechase. Samantalang naibulsa naman ni John Clinton ang gintong medalya sa 400-meter run at bronze medal sa 200-meter.

“Sobrang saya po kasi ‘yong hirap at sakit ng katawan na napagdaanan ko at namin is nagbubunga na po. Lahat ng sakripisyo namin ay unti-unti ko nang nakakamit sa tulong ni Lord and with strong fighting spirits during each game,” ani Jericho sa kanilang pagkapanalo.

“Super overwhelmed po ako no’ng nakuha ko ‘yong pinakauna kung ginto in the international stage kasi pangarap ko lang ito noon pero ngayon naabot ko na s’ya. Marami pa akong aabutin na pagtatrabahuhan ko pa,” dagdag ni John Clinton.

Bago ang kanilang naging mga tagumpay sa Indonesia, nakapag-uwi rin sina Jerico at John Clinton ng mga medalya sa ginanap na ASEAN Schools Games sa Da Nang, Vietnam, at 2024 Palarong Pambansa sa Cebu City nito lamang nakaraan.

Matapos ang kanilang mga naging tagumpay sa iba’t ibang kumpetisyon, nakatuon naman ang dalawang atleta mula sa CALABARZON sa pag-i-improve sa kani-kanilang Athletics category upang lumahok sa Batang Pinoy National Championships 2024 na nakatakdang na gaganapin sa Disyembre 15-21, 2024 sa Puerto Princesa, Palawan.

Pinaalalahanan naman ni Jericho ang kaniyang mga kapuwa learner-athlete na maging isang atleta na “coachable” dahil “you are not always right. Being coachable is the key to continous improvement. Never stop learning and listening.”

Gayundin, binigyang-diin naman ni John Clinton na nararapat na maging disiplinado ang isang learner-athlete.

“Sa lahat ng nangangarap na lumakas at manalo sa larangan ng palakasan, always keep on your bag ‘yong salitang ‘disiplina’ kasi lahat nagsisimula sa disiplina at lahat ng bagay makukuha mo kung may disiplina ka at lagi kang nagdadasal sa Panginoong Diyos,” saad ni John Clinton.

Mga larawan mula kila John Clinton Mitchel Abetong at Jericho Obsanga Cadag.